21-март Нооруз майрамына арналган салтанаттуу иш-чаралар Кыргызстандын бардык аймактарында өтүп жатат.
Бишкектин борбордук аянтында президент Садыр Жапаров жубайы Айгүл Жапарова менен чогуу катышып жаткан чоң салтанат өтүүдө. Шаар мэри Айбек Жунушалиевдин, президент Садыр Жапаровдун куттуктоосунан кийин майрамдык концерт башталды.
Ош шаарындагы борбордук аянтта өтүп жаткан майрамдык салтанатка министрлер кабинетинин төрагасы Акылбек Жапаров катышып, кыргызстандыктарды Нооруз майрамы менен куттуктады.
Нооруз майрамына карата салтанаттуу иш-чаралар Баткен, Жалал-Абад, Нарын, Талас, Чүй жана Ысык-Көл облустарында да өтүп жатат.
Ушул тапта Чүйдөгү жаңы курулуучу ат майданынын ордунда көк бөрү оюну боюнча "Нооруз-2024" республикалык мелдешинин финалы өтүп жатат. Бишкектеги "Ак кула" ат майданында улуттук ат оюндар, салбуурун уюштурулган. (ZKo)
