Кыргызстандын хоккей боюнча улуттук курама командасы Таиланд курамасына 4:9 эсебинде жеңилди. Беттеш хоккей боюнча III-дивизиондогу дүйнө чемпионатынын (А группасынын) алкагында өттү.
Аталган мелдешке Кыргызстан, Мексика, Түштүк Африка Республикасы, Люксембург, Түркмөнстан жана Таиланддын командалары катышып жатат. Мелдеш борбор калаадагы "Бишкек-Арена" спорт комплексинде өтүүдө.
10-март күнү Кыргызстан -Таиланд курамаларынын беттешинен сырткары эки беттеш өттү. Биринчи оюнда Түштүк Африка Республикасынын курамасы Мексиканы 6:3 эсеби менен жеңсе, экинчи оюнда Люксембургдун хоккей курамасы Түркмөнстанды 4:3 эсеби менен жеңди.
Бүгүн 11-мартта мелдештин экинчи тур оюндары өтөт.
Оюндардын убактысы:
14:00: Түштүк Африка Республикасы - Түркмөнстан
17:00: Мексика - Таиланд
20:00: Кыргызстан - Люксембург
Эл аралык хоккей федерациясы (IIHF) хоккей боюнча дүйнө чемпионаттарын өлкөлөрдүн рейтингине жараша беш дивизионго бөлүп өткөрүп келет. Жогорку, биринчи, экинчи, үчүнчү жана төртүнчү дивизиондо мелдештер А жана Б тайпаларында өтөт.
Буга чейин Кыргызстан төртүнчү жана үчүнчү дивизиондордо ойноп келген. Былтыр Босния жана Герцеговинада өткөн Дүйнө чемпионатынын III дивизионунун Б тайпасында жеңүүчү болуп, үчүнчү дивизиондун А тайпасына жолдом алган.
III дивизиондогу дүйнө чемпионатынын А группасынын оюндары 16-мартка чейин өтөт. Бул мелдештин жеңүүчүсү II дивизиондун Б группасына чыгууга мүмкүчүнчүлүк алат. (GT)
