Өзгөчө кырдаалдар министрлиги (ӨКМ) 13-февралда Бостери айылынын Тегерек жайлоосуна чыгып, түшө албай калган төрт бала куткарылганын маалымдады.
Министрликтин басма сөз кызматы кабарлагандай, алардын бири кулап кетип, бутун оорутуп алган. Жыйынтыгында тоодон түшө албай калган балдар жардам сурап кайрылган.
ӨКМдин Ысык-Көл облустук башкармалыгынын куткаруучулары атайын техника менен барып, балдарды аман-эсен үйүнө жеткиришкен. Ал эми бутун оорутуп алган баланы Чолпон-Ата шаардык ооруканасына алып барышкан.
8-январда Балыкчы шаарындагы Озерная кѳчѳсүндөгү кѳлмѳдѳ муз тээп жатып сууга түшүп кеткен эки баланы ӨКМдин куткаруучулары аман алып чыгышкан. Төрт куткаруучу чала тоңгон көлмөнүн музун жиреп сүзүп барып, балдарды куткаруучу шаймандардын жардамы менен куткарышкан.(ZKo)
