8-декабрдан бери дайынсыз болуп жаткан 15 жаштагы өспүрүмдүн сөөгү Ноокат районунун Чили-Сай участогунан табылды. Райондук милициянын ыкчам-тергөө тобу окуя болгон жерге барып, сөөккө соттук-медициналык экспертиза дайындады.
Ош облустук ички иштер башкармалыгы (ОИИБ) маалымдагандай, 15 жаштагы уулу 8-декабрда кечке жуук үйдөн чыгып кеткен боюнча дайынсыз жок болуп жатканын 9-декабрда милицияга анын атасы кабарлаган.
Милициянын маалыматына караганда, психикалык жактан жабыркаган өспүрүмдүн сөөгү аңдан табылган.
15-январда Бишкекте да аутизмден жабыркаган 5 жашар баланын сөөгү конуш четиндеги көлмөдөн табылган.
Аутизмден жабыркаган дагы бир адам 14-январда Аламүдүн капчыгайында дайынсыз жоголгон. ӨКМдин куткаруучулары, милиция кызматкерлери жана башка ыктыярчылардын дээрлик он күндөн ашык издөөсү натыйжа бербей, жыйынтыгында издөө токтотулган.(ZKo)
