Облустун Сузак, Базар-Коргон райондорунда жана Жалал-Абад шаарынын айланасында жер көчкү коркунучу бар аймактарда жашаган үй-бүлөлөргө эскертүү берилип, коопсуз жакка көчүп кетүү сунушталды.
Өзгөчө кырдаалдар министрлигинин (ӨКМ) Жалал-Абад облустук башкармалыгынын кызматкерлери көчүрүү комиссиясынын өкүлдөрү менен чогуу элге түшүндүрүү иштерин жүргүзүп, кооптуу аймактан биротоло көчүүнүн зарылдыгын эскертишти.
ӨКМдин маалыматына караганда, Жалал-Абад облусунда 1074 үй-бүлө кооптуу аймакта жашайт, алардын басымдуу бөлүгү Сузак районунда жайгашкан.
Кыргызстанда жер көчкүлөрдүн 93% Ош жана Жалал-Абад облустарына тиешелүү. Бул аймактарда адам өлүмү менен коштолгон жер көчкүлөр бир нече жолу катталган.
2003-жылы Өзгөндө жер көчкү бир айылды басып калып, 40 адам набыт болгон. 2009-жылы Аксыда жүргөн жер көчкүдө Райкомол айылынын 16 тургуну набыт болгон, анын 11и балдар болчу.
2017-жылы жер көчкү Өзгөн районунун Зергер айыл аймагындагы Аюу-Сай айылында жети үйдү басып, 24 киши анын алдында калган. Беш күн бою жүргүзүлгөн издөө, казуу иштеринде сегиз кишинин сөөгү табылган. (ZKo)
Жалал-Абад: кооптуу аймактарда жашагандарга көчкү тууралуу эскертүү берилди
Дагы караңыз
