Борбор Азия футбол ассоциациясынын (CAFA) аялдар арасындагы чемпионатында Кыргызстандын курамасы Түркмөнстанды жеңди. Беттеш 4-февралда Дүйшөмбү шаарында болду.
CAFA Women's Futsal Championship 2024 мелдеши тажик баш калаасында ушул күнү башталды. Биринчи турдагы оюнда кыргызстандык кыз-келиндер түркмөнстандык атаандаштарын 3:1ге утканын Кыргыз футбол бирлиги кабарлады.
Кыргызстандын курамасы турнирдеги кезектеги беттешин 5-февралда Тажикстандын командасы менен өткөрөт.
Жобого ылайык, жеңүүчү команда эң упай менен аныкталат.
Борбор Азия футбол ассоциациясы (CAFA) Азия футбол конфедерациясына (АФК) карайт. 2014-жылдын 10-июнунда негизделип, 2015-жылдын 9-январында расмий түрдө иштей баштаган. Ал Кыргызстан, Өзбекстан, Тажикстан, Түркмөнстан, Ооганстан, Иран футбол федерацияларын бириктирет. 2015-жылдын ортосуна чейин уюм Борбор Азия футбол федерациясы деп аталган. (SE)
