Юстиция министрлигине караштуу Жаза аткаруу кызматы №1 түзөтүү мекемесинде болжол менен 50-60 адамдан турган соттолгондордун тобу мекеменин кызматкерлеринин мыйзамдуу талаптарына баш ийбестик көргөзгөнүн бүгүн, 27-январда кабарлады. Расмий маалыматка караганда, бул аракеттердин уюштуруучулары жана үгүттөгөндөр аныкталды.
Тергөө-ыкчам иш-чаралардын натыйжасында, 11 грамм баңгизаты, 22 уюлдук телефон, 120 даана кесүүчү-саюучу буюмдар, курамында спирт бар колго жасалган 1 л зат жана 146 даана ар кандай буюмдар табылып, алынды.
Аталган фактылар боюнча тергөө иштери башталды.
№1 түзөтүү мекемеси Чүйдүн Молдовановка айылында жайгашкан.
"№1 түзөтүү мекемесинде кырдаал туруктуу, мекеме штаттык режимде иштеп жатат", - деп жазылган маалыматта.
Жаза аткаруу кызматы абак жайлардын биринен тыюу салынган ондогон буюмдар табылганын 26-январда билдирген. Мекеменин басма сөз кызматы тараткан маалыматка караганда, тыюу салынган буюмдарды табуу жана конфискациялоо, мүмкүн болгон жер астындагы казууларды жана башка качууга даярдыктарды аныктоо максатында жаза өтөөчү жайлардын биринде жалпы тинтүү жүргүзүлгөн. Анын жыйынтыгында 100гө чукул мобилдик телефон, 160тан ашуун саюучу-кесүүчү буюмдар, акча каражаттары табылып, алынган.
Ички тартип эрежелерине баш ийбеген соттолгондор айып изоляторуна киргизилген. (КЕ)
