Ысык-Көл облустук ички иштер башкармалыгына Жети-Өгүз районунда жашаган тургун кайрылган. Ал арызында 2007-жылы туулган кызы 11-январда зордукталганын маалымдаган.
Милиция ишти каттоого алып, сотко чейинки өндүрүш башталды.
Облустук милициянын маалыматына ылайык, кызга соттук-медициналык экспертиза дайындалды. Азырынча мындан башка маалымат бериле элек.
Акыйкатчы институту 2022-жылы Кыргызстанда жашы жете элек балдарга зордук-зомбулук, адам укугун бузуу боюнча иштердин 31% кыскартылып, 32% гана сотко жеткенин маалымдаган. Калган 37% создуктурулуп, өндүрүштө калган.
Былтыр апрелде Жогорку Сот эки милиционерди 13 жаштагы кызды зордуктоого айыптап, бирин 7,5 жылга, экинчисин 9 жылга эркинен ажыраткан. Укук коргоочулар жана жарандык коом милиция кызматкерлеринин мыйзамсыз иштери үчүн ички иштер министри Улан Ниязбековдун кызматтан кетишин талап кылып, бир нече жолу министрликтин алдына митингге чыгышкан.
Балдарга карата зордук-зомбулук токтобой жатканын Улуттук коопсуздук боюнча мамлекеттик комитеттин жетекчилиги да ырастап, укук коргоо органдарын буга каршы күрөшүүгө чакырган. (AsK/ZKo)
