Өзгөчө кырдаалдар министрлиги 15-январда күтүлүп жаткан жаан-чачынга байланыштуу Кыргызстандын тоолуу райондорундагы жолдордо кар көчкү түшүүсү ыктымалдыгын билдирүүдө. Маалыматка ылайык, Бишкек-Ош унаа жолунун Төө-Ашуу ашуусунда, Чычкан капчыгайында, Ала-Бел ашуусунда, Мырза-Аке - Кара-Кулжа - Алайкуу унаа жолунун 55-115 чакырымдарында, Ала-Бука - Каныш-Кыя унаа жолунун Чапчыма ашуусунда жана Красная-Горка - Акташ унаа жолунда кар көчкү түшөт жана кар күрткү чогулат, жолдор тайгак болуп муз тоңот.
Министрлик айдоочуларга унаалардын ортосундагы 500 метр аралыкты сактоону эскертүүдө.
Ушул тапта Ала-Бука - Каныш-Кыя унаа жолу кар көчкү коркунучуна байланыштуу 15-январдан тарта түнкү саат 00:00дөн таңкы саат 06:00гө чейин аба ырайы турукташканча убактылуу жабылды. (ZKo)
