14-январда Хорватияда өтүп жаткан Zagreb Open рейтингдик мелдешинде 76 килограмм салмакта кыргызстандык спортчу Айпери Медет кызы финалда Кытайдан келген балбан кыз Хуан Ваны 2:1 эсебинде жеңип, алтын медал алды.
Айпери Медет кызы 1/16 баскычындагы күрөшүндө орусиялык Рита Талисманованы уткан. Андан кийин канадалык Жюстин Ди Стасиону жеңген.
Чейрек финалда 1 мүнөт 55 секундда дүйнөнүн алты жолку чемпиону, Токиодогу Олимп оюндарынын күмүш медалынын ээси Аделина Грейди 10:0 эсеби менен жеңип алды. Дал ушул Аделина Грейден Айпери Медет кызы 2021-жылы Жапонияда жарым финалда бир упай менен утулуп калган. Ошентип, кыргызстандык балбан кыз бул ирет реванш алды.
Жарым финалда Айпери Медет кызы француз Полин Лекарпент менен күрөшүп, аны 5:0 эсеби менен утуп, финалга чыккан.
Ушул эле мелдештин алкагында 12-январда дүйнөнүн үч жолку, Азиянын беш жолку чемпиону Айсулуу Тыныбекова 62 кг чейинки салмак ченинде финалда АКШдан келген Кайла Мираклды 7:0 эсебинде утуп, алтын алган.
Айпери Медет кызы былтыр 6-октябрда Кытайдын Ханчжоу шаарында өткөн XIX Азия оюндарында алтын медалга жеткен. 2018-жылы Азия оюндарында коло медалга ээ болгон.
Ал эми 2023-жылдын сентябрында Сербиянын Белград шаарында өткөн дүйнө чемпионатында күмүш медал утуп, быйыл Парижде өтө турган Олимп оюндарына лицензия уткан.
Ушул тапта 2024-жылкы Париж Олимпиадасына Кыргызстандын эсебинде беш жолдомо бар. Былтыр грек-рим күрөшүнөн Жоламан Шаршенбеков, Акжол Махмудов, кыз-келиндер күрөшүнөн Айпери Медет кызы, Айсулуу Тыныбекова Олимпиадага жолдомо алган. Андын тышкары сууда сүзүүчү Денис Петрашов да Жапонияда өткөн Дүйнө чемпионатынын жыйынтыгында Олимпиадага катышууга лицензия уткан. (BTo)
