Пакистанда түрмөдө отурган мурдагы премьер-министр Имран Хандын партиясы шайлоо алдында жапырт мыйзам бузуу менен коштолгон кысымга кабылып жатканан бүгүн 2-январда жергиликтүү укук коргоочулар айтып чыгышты.
Шайлоо комиссиясы оппозиционер Хандын Pakistan Tehreek-e-Insaf (PTI) партиясын бюллетендеги тизмеге кошкон, бирок анын өзүн жана көптөгөн башка тарапкерлерин киргизген эмес.
«Кабыл албай койгон көрүнүштөр системалык мүнөзгө ээ болгон сыяктанат», - деп билдирди France-Presse агенттигине Пакистандын Адам укуктары боюнча комиссиясынын (HRCP) өкүлү Фархатулла Бабар.
71 жаштагы Хан камакка былтыр августта коррупция үчүн алынган. Ал Пакистан өкмөтүн 2018-2022-жылдары башкарган. Бийликтен 2022-жылы парламент ишенбөөчүлүк көрсөтүп чыккандан кийин кеткен.
Жаңы премьер-министрди тандай турган парламенттик шайлоо Пакистанда 8-февралда өтөт.
Дагы бир мурдагы премьер-министр, 2017-жылы жемкорлукка байланыштуу айыптоолордон улам кызматтан алынган 74 жаштагы Наваз Шариф төртүнчү жолу өкмөттү башкаруу үчүн шайлоого катышмай болгонун өткөн аптада жарыялаган. (RK)
