Акыйкатчынын орун басары Шухрат Айтиев 31-декабрда оорудан улам каза болду. Бул тууралуу Акыйкатчы институтунун басма сөз кызматы кабарлады.
39 жаштагы Айтиевдин артында жубайы, төрт баласы калды. Ал Бишкектеги ооруканада үзүлгөнү айтылды.
Шухрат Айтиев 2023-жылы июнда акыйкатчынын орун басары болуп дайындалган. Ага чейин Жалал-Абад облусунун журналистика борборунун директору, Жогорку Кеңеште бөлүм башчысы, Транспорт жана коммуникация министрлигине караштуу Жерде жүрүүчү жана суу транспорт департаментинин директору кызматын аркалаган.
Айтиев 2008-жылы Ош мамлекеттик университетинин психология адистигин, 2018-жылы Жусуп Баласагын атындагы Кыргыз улуттук университетинин юриспруденция адистигин аяктаган.
Эмгек жолун 2002-жылы Баткендеги “Салам” радиосунда журналист болуп баштаган.
Анын сөөгү 1-январда коюлат, коштошуу зыйнаты Жалал-Абад шаарында өтөт.
