Кыргызстандын эл аралык акча которуулар системасынын реестринде Kanberry PTY деп аталган жаңы акча которуу системасы катталды.
Улуттук банктын билдиришинче, жаңы оператор мекеменин каттоо жол-жобосунан 25-декабрда өткөн.
Маалыматка ылайык, Kanberry PTY акча которуу системасынын баш кеңсеси Австралияда жайгашкан.
Учурда “Кыргызстандын эл аралык акча которуу системаларынын реестринде” 17 компания каттоодо турат. 2023-жылы реестрге Kanberry PTY компаниясынан тышкары дагы үч орусиялык оператор кошулган.
Улуттук банктын маалыматында, 2023-жылы Кыргызстанда эл аралык акча которуулар системалары аркылуу 165 млрд сомдон ашуун акча которулган. Бул былтыркы көрсөткүчкө караганда дээрлик 40% аз. Анын ичинен 125,5 млрд сом Кыргызстанга которулса, 39,8 млрд сом сыртка чыккан. Акча которуулар системаларынын ичинен кардарлар тарабынан эң көп колдонулганы “Золотая Корона” жана “Юнистрим” операторлору болууда. (KbA)
