Казакстандын Ички иштер министрлиги "НеМолчиKZ" фондунун негиздөөчүсү Динара Смаиловага (Дина Тансари) издөө жарыялады.
Жергиликтүү басылмалардын маалымдашынча, издөө иштери 2023-жылдын 27-декабрында Чыгыш Казакстан облусунун ички иштер бөлүмүндө катталган.
Буга чейин Смаиловага алдамчылык шеги менен кылмыш иши козголгону кабарланган.
Күзүндө Дина Смаилова эки жылдан бери үй-бүлөсү менен жашап келген Грузияга киргизилбегени маалым болгон.
Айрым маалыматтарга караганда, Смаилова азыр Европа мамлекеттеринин биринде саясий башпаанек берүү чечимин күтүп жатат.
Дина Смаилова – аялдардын, анын ичинде зордук-зомбулукка кабылгандардын укуктарын коргогон #NeMolchi.kz фондунун жетекчиси. Бул жылы фондду Грузияда расмий каттоодон өткөрүп, салык органдарынан жана өлкө бийлигинен уруксат алган.
