Баткен райондор аралык оорулардын алдын алуу жана мамлекеттик санэпид көзөмөл борборунан "Азаттык" радиосуна билдиргендей, балдар арасында сарык оорусунун көбөйгөнүнө байланыштуу үч бала бакча убактылуу карантинге жабылды.
Бул чектөө 2024-жылдын 1-январына чейин кабыл алынган.
Сарык оорусу боюнча өткөн жылдын 11 айында 390 учур катталган.
2023-жылдын 11 айында 1661 учур катталса, анын 1633 учуру гепатиттин А түрү. Негизинен 2 жаштан 7 жашка чейинки балдар арасында көп.
"Көбөйгөнүнүн биринчи себеби вирустун өзүнүн касиети. Төрт-беш жылда сөзсүз түрдө көтөрүлүп турат. Мисалы, 2016-жылы да 3 миңден ашык учур катталган. 2019-жылы 1600 учур катталган. Алдын алуу иш-чаралары жүрүп жатат. Мектеп, балдар бакчаларына түшүндүрүү иштери жүргүзүлүп, үйлөргө дезинфекциялык каражаттар таратылып жатат", - деп билдиришти райондор аралык оорулардын алдын алуу жана мамлекеттик санэпид көзөмөл борборунан.
Май айында Саламаттык сактоо министрлигине караштуу Ооруларды алдын алуу жана мамлекеттик санитардык-эпидемиологиялык көзөмөлдөө департаменти Кыргызстанда быйыл январь-апрель айларында вирустук гепатит оорусун жугузуп алган 1 364 учур катталганын кабарлаган.
Дарыгерлердин айтымында, гепатиттин С түрүнөн толугу менен айыгып кетсе болот, дарылоонун узактыгы үч же алты айга созулат. Ал үчүн дарылоонун шарттарын бекем сактап, дарыгердин айткандарын так аткаруу керек.
Өнөкөт В вирустук гепатитинен дарылоо узагыраак болот (бир нече айдан бир нече жылга чейин созулушу ыктымал, балким, өмүр бою дарыланууга туура келет).
Гепатиттин В түрү менен ооруган бейтап вируска каршы дарыланганда, анын ден соолугу жакшырат, дарылар боордун циррозунан жана рак оорусунан сактанууга жардам берет.
Гепатит – боордун сезгенишине алып келген жугуштуу оору. Анын А, В, С, Е жана D түрлөрү бар. А түрү эл арасында сарык деген ат менен тараган. Калган формалары кан аркылуу жугат. (JsA)
