Экономика министри Данияр Амангелдиев Кыргызстанда туристтик объектилерди, мейманкана курган ишкерлерди 5 жылга салыктан бошотуу каралып жатканын билдирди. Мындан сырткары аларга "артыкчылыктуу мамлекеттик долбоор" макамы берилип, бажы төлөмдөрүнөн дагы бошотуу аракети көрүлүп жатканын айтты.
"2023-жылдын туристтик мезгилинин жыйынтыгында Кыргызстандын инфратүзүмү даяр эместигин байкадык. Быйыл туристтердин агымы чоң болду. Демек, биздин өлкөгө суроо-талап жогору. Бул тармак Кыргызстандын туристтик мүмкүнчүлүгү өлкөнүн экономикасына 20% чейин салым кошууга жөндөмдүү тармактардын бири.", - деди Амангелдиев.
Буга чейин Туризм департаменти быйыл тогуз айда Кыргызстанга 6 млн турист келгенин билдирген.
Президенттин Ысык-Көл облусундагы өкүлчүлүгүнүн маалыматы боюнча, быйыл жайкы сезондо көлдө 1,3 миллиондой киши эс алды.
Негизинен Кыргызстанга туристтер Ысык-Көл облусуна келет. Аймакта 1127 эс алуу жайы бар, алардын 852си Ысык-Көл районунда жайгашкан. (КЕ)
Facebook шеринеси