Жогорку Кеңештин депутаты Камила Талиева Улуттук статистика комитетинин маалыматтарына шилтеме берип, Кыргызстанда акыркы төрт жылда төрөт азайып кеткенин билдирди. Бул тууралуу ал парламенттин 14-декабрдагы жыйынында айтып, калктын демографиялык абалын жакшыртуу боюнча мыйзам долбоорун сунуштады.
“Мисалы, 2019-жылы төрөлгөндөрдүн саны 173 484, 2020-жылы 158 112 (15 миң адамга аз), 2021-жылы болсо 150 164 (дагы 8 миң кишиге аз) тѳрѳлгѳн. Төрөт боюнча жөлөк пул алгандардын азайышы Кыргызстанда төрөлгөндөрдүн саны төмөндөгөнүн айгинелеп турат. Өткөн жылы “Балага сүйүнчү” жөлөк пулун алуучулар 12,9% кыскарып, 130,2 миң адамды түздү”, - деди депутат.
Камила Талиева мындан ары мамлекет үй-бүлөдө төрөлгөн 3-балага артыкчылык берүү жана андан көп бала төрөлгөн үй-бүлөлөрдүн балдарын камкордукка алуу саясатын жакшыртууга чакырды.
2023-жылы тогуз айда Кыргызстандын калкынын саны 92 800 адамга көбөйгөн. Жыйынтыгында быйылкы жылдын октябрына карата өлкөдө элдин саны 7 млн 130 миң адамга жетти.
Кыргызстандын 7 миллионунчу жараны Баткен облусунун Кызыл-Кыя шаарында былтыр 19-октябрда төрөлгөн. Кыргызстан калкынын санынын өсүшү боюнча Борбор Азияда экинчи орунда турат. (BTo)
