Мамлекеттик ипотекалык насыяга азыр кезекте турган 13 миң адам келерки эки жылда үй менен толук камсыз болот. Бул тууралуу президент Садыр Жапаров 28-ноябрда Бишкекте жаштар форумунда сүйлөп жатып билдирди.
Мамлекет башчынын айтымында, соңку жылдары эки миңдей киши мамлекеттен жеңилдетилген шартта ипотекага үй алды:
«Мен бийликке келгенде Ипотекалык компаниянын саясатын жүз пайыз өзгөрттүк, ал банк сыяктуу эле компания болуп калган экен, банктан насыя алып, 14% менен ипотека аласың, 30% алдын ала төлөйсүң деген. Анын баарын жоюп, 4% кылып, алдын ала эч кандай акча төлөбөй, бөлмөлөрдүн санына жараша 15-20 жылга чейин төлөп кете бересиң деген саясатты жүргүзүп келе жатабыз. Мен келгенден бери 1,5-2 миңдей үй-бүлө үйлүү болду. Азыр эми кезекте 13 миң адам турат республика боюнча, алардын көпчүлүгү мамлекеттик кызматкерлер. 2024-2025-жылдары 13 миңди тең толук камсыз кылып бүтөбүз. Андан ары 2030-жылдарга чейин ар бир жараныбызга, мейли жаштарбы, мигрантпы, базарда отурабы, ипотекалык үйлөрдү бере баштайбыз».
Мамлекеттик ипотекалык компания 2015-жылы өкмөттүн демилгеси боюнча элдин турак жай алуу мүмкүнчүлүгүн жогорулатуу максатында түзүлгөн.
Коммерциялык банктарда ипотекалык кредиттин пайызы 20% тегерегинде. (RK)
