Кыргызстанда пенсиянын камсыздандыруу бөлүгүн келерки жылы 7% көбөйтүү максаты тууралуу Социалдык фонддун төрагасы Бактияр Алиев билдирди. Ал буга мамлекеттик бюджеттен кошумча 997 млн сом каралып жатканын бүгүн, 20-ноябрда Жогорку Кеңештин Социалдык саясат комитетинде 2024-жылдын бюджетин талкуулоо учурунда билдирди.
"Азырынча пенсиянын камсыздандыруу бөлүгүн 7% көбөйтүү планыбыз бар. Кийинки жылдын биринчи жарымындагы акчанын түшүүсүнө жараша 1-октябрда көтөрүү боюнча так маалым болот", - деди Алиев.
Соцфонддун төрагасынын айтымында, бүгүнкү күнү Кыргызстандагы пенсионерлердин 24% пенсиясын "Кыргыз почтасы" аркылуу, калганы банктар аркылуу алат. Бул алардын тандоосуна жарашат болот.
Кыргызстанда жыл сайын 1-октябрда пенсиянын камсыздандыруу же базалык бөлүгү көтөрүлүп келет. Быйыл 1-октябрда камсыздандыруу бөлүгүнүн эсебинен пенсия 38 пайызга жогорулаган. Учурда пенсиянын орточо өлчөмү 9330 сом.
Кыргызстанда азыркы тапта 765 миң пенсионер бар.(ZKo)
