Ысык-Көл облусунда жетекчилик алмашты. Бүгүн 10-ноябрда президенттин жарлыгы менен анын Ысык-Көл облусундагы ыйгарым укуктуу өкүлү болуп Эмилбек Абдыкадыров дайындалды.
Абдыкадыров 2022-жылдын февралынан бери Бишкек шаарынын мэри болуп иштеп келип, өткөн аптада бошотулган.
Облустун буга чейинки жетекчиси Илияз Иманбетов бул кызматта былтыр 28-сентябрдан бери иштеди.
65 жаштагы Абдыкадыров 2021-жылы №21 Талас шайлоо округунан Жогорку Кеңештин депутаттыгына талапкер болгон. Ал 2020-жылы Ат-Башыдагы чек арага жакын аймакта логистикалык борбор куруу ниетин билдирген кытайлык ишкердин өнөктөшү болгон. Логистикалык борбор жергиликтүү тургундардын каршылыгынан улам салынбай калган.
Бишкек шаарында анын тушунда коомдук транспорттун реформасы башталды – автобустар үчүн алгачкы жолу өзүнчө тилке ачылып, жол кире накталай эмес формада да кабыл алынууда, коомчулукта нааразылык жаратып келген кичи автобустардын он чакты каттамы жоюлду.
