Өзгөчө кырдаалдар министрлиги 3-октябрда машыгуу маалында Бишкек жана Ош шаарларында, облустар менен район борборлорунда сиреналар кыска мөөнөткө катуу жаңырарын билдирди. Мындан улам жарандарга кайрылып, дүрбөлөңгө түшпөөгө чакырды.
"3-октябрда саат 10дон 11ге чейинки аралыкта беш мүнөткө чейин сиреналар катуу жаңырып, машыгуу өтөт. Андыктан жарандарды сиренанын үнүн укканда дүрбөлөңгө түшпөөгө чакырабыз. Бул машыгуу! Машыгуунун максаты - өзгөчө кырдаалдар катталган учурда адам өмүрүн сактоо, материалдык чыгымдарды азайтуу. Иш-чара 5-октябрь – Кыргызстандагы кырсыктардын тобокелдигин азайтуу күнүнө карата уюштурулат", - деп жазылган маалыматта.
Буга чейин өзгөчө кырдаалдар министри Бообек Ажикеев Кыргызстанда жыл сайын 400дөй табигый кырсык катталарын билдирген.
