Өзбекстан менен АКШ кызматташуу жаатында 12 документке кол коюшту. Арасында энергетика, машина куруу, маалыматтык-коммуникациялык технологиялар, айыл чарба, илимий-техника, медицина жана башка тармактарда продукцияларын өндүрүү боюнча макулдашуулар бар.
Ташкенттин расмий маалыматына ылайык, документтерге 15-сентябрда Вашингтондо өткөн өзбек-америка бизнес форумунда кол коюлган.
Форумга эки өлкөнүн тиешелүү министрликтеринин, өнөр жай бирикмелеринин, коммерциялык банктарынын жана инвестициялык мекемелердин башчылары, АКШнын ири корпорацияларынын жетекчилери катышты.
Бизнес-форум Өзбекстандын президенти Шавкат Мирзиёевдин АКШга сапарынын алдында өттү.
Мирзиёев Нью-Йоркко БУУнун Башкы ассамблеясынын 78-сессиясына катышуу үчүн 17-сентябрга караган түнү барды. Ал 19-сентябрда АКШ президенти Жо Байден менен Борбор Азия мамлекеттеринин президенттеринин C5+1 форматындагы жолугушуусуна катышат.
