Берлин Украинага Gepard зениттик системасы үчүн ок-дары бергенин 5-сентябрда Германиянын Коргоо министрлиги билдирди.
Министр Борис Писториус немис өкмөтү Киевди артиллерия, ок-дары жана абадан коргонуу системалары менен камсыздоону уланта турганын айтты. Жетишилген макулдашуулардын алкагында Украина зениттик системалар үчүн 300 миң снаряд алат.
11-июлда НАТОнун Вильнюстагы саммитинде министр Писториус Германия Украинага 700 миллион евро өлчөмүндөгү аскерий жардамдын жаңы пакетин бөлгөнүн жарыялаган.
Орусия Украинага согуш ачкандан бери Киевдин Батыштагы өнөктөштөрү курал-жабдык жактан жардам берип келет. Келишимге ылайык, Киев ал куралдарды коргонуу үчүн гана колдонууга тийиш.
