Жалал-Абад облустук Ички иштер башкармалыгы Ноокен районунун 43 жаштагы тургуну айылдашын мылтык менен атып салганын билдирди.
Окуя 26-августка караган түнү Шайдан айылында болгон. 4-сентябрда таратылган расмий маалыматта айтылгандай, шектүү түн жарымда көчөдө отурган өспүрүмдөрдү көздөй мергенчилик мылтыгынан аткан, ок 15 жаштагы балага тийип, ал ооруканада каза болгон.
Ноокен райондук милициясы Кылмыш-жаза кодексинин 122-беренеси ("Адам өлтүрүү") менен кылмыш ишин козгоду.
Шектүү эки айга убактылуу кармоочу жайга киргизилди. (TB)
