Маданият, маалымат, спорт жана жаштар саясаты министрлиги Кыргызстанда ТикТокту колдонууга тыюу салган чечим кабыл алды. Аталган мекеме соңку учурда бул социалдык тармак балдардын психикалык өнүгүүсүнө, саламаттыгына терс таасир тийгизип жатканына кабатырланган кайрылуулар көбөйгөнүн 30-августта маалымдады.
"Белгилей кетсек, ТикТок колдонуучуну кыска клиптердин виртуалдык дүйнөсүнө батырат, аларды көргөндөн кийин өспүрүмдөр тигил же бул клиптерди кайталоого аракет кылат, алардын айрымдары балдардын өмүрүнө коркунуч туудурат. Ушуга байланыштуу министрлик бул социалдык тармактын контентине мониторинг жүргүзүп, анда балдардын саламаттыгына, өнүгүүсүнө зыян келтирген маалыматтар чектелбей, жаш курагынын категориясы көзөмөлдөнбөй жатканын аныктады. Көптөгөн кайрылууларды эске алуу менен жана жүргүзүлгөн мониторингдин негизинде министрлик Кыргызстанда ТикТокту жайылтууну токтотуу тууралуу чечим кабыл алды. Мыйзамдарга ылайык, чечимди андан ары ишке ашыруу үчүн Санарип өнүктүрүү министрлигине кат жөнөтүлдү",- деп жазылган маалыматта.
Санарип өнүктүрүү министрлиги бул чечимге байланыштуу азырынча комментарий бере элек.
Буга чейин Улуттук телерадиокорпорациясынан ТикТокту жабуу тууралуу сурамжылоого негизделген бир катар материалдар көрсөтүлгөн.
Президент Садыр Жапаров 14-августта балдардын маалымат коопсуздугу жаатындагы бир катар мыйзамдарга (Укук бузуулар кодекси, "Кыргызстандагы балдардын ден соолугуна, дене бой, интеллектуалдык, психикалык, руханий жана адептик өнүгүүсүнө зыян келтирүүнүн алдын алуу боюнча чаралар жөнүндө” жана “Массалык маалымат каражаттары жөнүндө” мыйзамдарга) өзгөртүү киргизүү жөнүндөгү мыйзамга кол койгон.
Ага ылайык, документтер “балдардын маалымат коопсуздугу”, “балдардын ден соолугуна же өнүгүүсүнө зыян келтирүүчү маалымат”, “маалымат продукциясы”, “балдар үчүн маалымат продукциясы” деген түшүнүктөр менен толукталган. Ошондой эле жашы жете элек балдардын өнүгүүсүнө зыян келтириши мүмкүн болгон берүүлөрдү, маалыматтарды чектөө, таратууну тыюу талаптары жазылды. Андан сырткары балдарга зыян делген маалыматтардын тизмеси берилген.
Ушул жылдын май айында АКШнын Монтана штатында ТикТокту колдонууга тыюу салынган.
Батышта бул тиркемеге ээлик кылган ByteDance компаниясы колдонуучулардын жеке маалыматтарын Кытайдын бийлигине өткөрүп берип, жалган маалымат таратуу үчүн пайдаланып кетиши ыктымал деп чочулоо бар.
Евробиримдиктин бардык институттарында, Британия, Франция, Нидерланд, Жаңы Зеландия, Бельгия, Дания, АКШ, Тайванда ТикТокту кызматтык чөнтөк телефондорго же башка жабдыктарга орнотууга тыюу салынган.
АКШда андан тышкары айрым коллеж, университеттерде да ТокТокту пайдалануу мүмкүн эмес.
Ал эми Индия бул тиркемени өлкөнүн аймактык бүтүндүгүн бузган платформалардын “кара тизмесине” киргизген.
Быйыл мартта Кошмо Штаттарда платформага тыюу салуу демилгесине каршы акциялар болгон. Катышуучулар сөз эркиндигине көлөкө түшөрүн айтышкан.
