Ош шаардык милициясы шаардагы бассейндердин биринде эс алып жүргөн 22 жаштагы жаранга бычак сайып, качып кеткен шектүү киши кармалганын билдирди. Милиция ал мурда бир нече жолу соттолгон, кылмыш чөйрөсүнүн идеяларын колдогон жаран экенин айтууда.
Ош шаардык ИИБнын маалыматына караганда, ушул жылдын 22-июлунда, болжол менен саат 21.30 чамасында шаардагы бассейндердин биринде эс алып жүргөн 21 жаштагы жаран денесинен жарат алып ооруканага түшкөн. Ал көрсөтмөсүндө бассейнде эс алып жүрүп, белгисиз бирөө менен уруша кеткенин, ошондо бычак менен бел тушуна сайып, качып кеткенин айткан.
"Ош шаарынын аймагында жашынып жүргөн жеринен Кара-Суу районунда 1995-жылы туулган Н. М. кармалды. Ал мурда бир нече жолу соттолгон, кылмыш чөйрөсүнүн идеяларын колдогон жаран экендиги жана кылмыш чөйрөсүндө "коён" деген каймана ат менен белгилүү экендиги аныкталды", - деп кабарлады Ош шаардык милициясынын басма сөз кызматы.
