Блогер Улукбек Карыбек уулу "бейбаштык" беренеси менен козголгон кылмыш иштин алкагында Ош шаардык Ички иштер башкармалыгынын убактылуу кармоочу жайына 48 саатка камалды.
Бул тууралуу шаардык милициянын басма сөз катчысы Абсаттар Тавакалов "Азаттыкка" ырастады. Маалыматка караганда, 7-июлда Ош облустар аралык клиниканын төрөт стационарынын башкы дарыгери блогерге чара көрүүнү өтүнүп кайрылган. Ал белгисиз журналисттер төрөт үйүн уруксатсыз видео тасмага тартып, жумушка тоскоолдук жаратып жатканын билдирген.
"Тергөө тобу ал жерге журналист Улукбек Карыбек уулу барганын, аны төрөт үйүнүн кызматкерлери киргизбей койгонун аныктап түшүндүрүү иштери жүргүзүлгөн. Ошол эле күнү блогер өзүнүн эки шериги менен төрөт үйүнүн арткы эшигин бузуп, эч кимдин уруксаты жок санитардык нормаларды сактабай жандандыруу бөлүмүнө кирип барган", - деди Тавакалов.
Ош шаардык милициясы билдиргендей, блогерлер төрөт үйүнүн эки кызматкерине баш бербей, түртүп киргени, жаңы көз жарган он чакты келинден маек алган. Блогердин аракетинен улам аталган оорукана 37 миңге жакын материалдык зыян тарткан.
Тавакалов бул иш боюнча тергөө жүрүп жатканын жана Карыбек уулунун жанында жүргөн шериктери дагы сурак берип жатканын кошумчалады.
Улукбек Карыбек уулун 14-июлда Бишкекте милиция кызматкерлери кармап, Ош шаарына алып кеткенин досу Кубан Садыров билдирген. Ал Улукбек Карыбек уулу кайсы иш боюнча кармалганы тууралуу так маалымат жок экенин, бирок акыркы жолу Ош облустук төрөт үйүндөгү көйгөйлөр тууралуу видео тартылганын айткан.
Март айында Министрлер кабинетинин төрагасынын орун басары Эдил Байсалов Улукбек Карыбек уулунун бала бакчага кирип барган тасмасын сынга алып, мындай ишмердүүлүктүн артында саясий карьера жасоо максаты турат деген оюн билдирген. Ал ушундан улам блогерлер тартипке чакырыларын айткан.
Улукбек Карыбек уулу Байсаловго жооп берип, “эгерде министрликтер, мэриянын кызматкерлери, өз ишин сапаттуу аткарса, анда миңдеген адамдар блогер, журналисттерге кайрылмак эмес” деп жазган.
Улукбек Карыбек уулунун Ютубдагы каналына 500 миңден ашык адам катталган. Ал мамлекеттик мекемелердеги коррупциялык иштер, тейлөөнүн сапаты боюнча видеолорду жарыялап турат.
12-июлда “Ош облустук оңолбос төрөт үйү” деген материал чыгарган. Анда төрөт үйүндөгү шарттар жана жарандардан акча талап кылуу фактылары тууралуу сөз болгон. (КЕ/DSh)
