Транспорт жана коммуникациялар министрлиги чектөөгө карабай күн ысыкта жолго чыккан оор жүк ташыган машиналарга айып пул салынып жатканын билдирди.
Ага ылайык, 1-10-июль күндөрү эреже сактабаган айдоочуларга карата 15 протокол түзүлүп, 230 миң сомдон ашуун айып пул салынды. Учурда кан жолдордо текшерүү уланып жатат.
Аталган министрлик Кыргызстанда 1-июндан 1-сентябрга чейин жүк ташыган машиналарга күн ысыкта жолго чыгуусуна чектөө киргизген.
"Чектөөгө ылайык, саат 10:00дөн саат 20:00гө чейин, абанын күндүзгү температурасы 28 градустан жогору болгондо көлөмү 18 тоннадан ашкан жүк ташыган машиналарга жалпы пайдалануудагы жолдордо жүрүшүнө убактылуу тыюу салынат. Урматтуу айдоочулар, салынган жолдордун талкаланышына жол бербейли", - деп жазылган маалыматта.
Буга чейин күн ысыган маалда асфальт эрип, жүк ташыган оор машиналар жолду бузуп жатканы тууралуу нааразылыктар айтылып келген.
