АКШ президенти Жо Байден 25-июнда Украинанын президенти Владимир Зеленский менен телефон аркылуу сүйлөшүп, Орусиядагы соңку окуяларды, Украинанын коопсуздугу боюнча кызматташуу маселелерин талкуулады.
Ак үйдүн маалыматына караганда, Украинанын контрчабуулунун жүрүшү тууралуу сөз болуп, Байден АКШнын колдоосу, коопсуздук, экономикалык жана гуманитардык жардамы улана берерин айтты.
Украин лидери коргонуу багытындагы кызматташтыкты кеңейтүү, украин аскерлерине алыска сокку уруучу системаларды берүү тууралуу сөз болгонун Telegram каналына жазды. Ал АКШга абадан коргонуучу Patriot комплекстерин бергени жана аскердик учактар коалициясын колдогону үчүн ыраазычылык билдирди.
Зеленский Орусиядагы соңку окуяларды Канаданын жана Польшанын лидерлери менен да талкуулаганын жазды.
Орусияда “Вагнер” жеке менчик аскердик компаниясынын башчысы Евгений Пригожиндин “куралдуу козголоңу” эки күнгө жетпей аяктады. Орус президенти Владимир Путин ага Беларуска чыгып кетүүгө уруксат бергени белгилүү болду. Азырынча Пригожин кайда экени так белгисиз. Анын Ростов-на-Дону шаарынан башталып, Москвага 200 чакырым жетпей барып токтоду деп айтылган жүрүшү соңку 20 жылдан ашык убакыттан бери Путиндин бийлигине урулган эң чоң сокку болуп калды.
