4-апрелде Бишкекте жазуучу, редактор, “Кыргызстандын жаңы адабияты” сайтынын негиздөөчүсү, теги украиналык Олег Бондаренко каза тапты.
Ал 1960-жылы Украинада жарык дүйнөгө келген. 1982-жылы Донецк университетинин каржы жана насыя бөлүмүн аяктаган. 1992-жылдан тартып өмүрүнүн акырына чейин Бишкекте жашады. Ар кандай басылмаларда кабарчы болуп да эмгектенген.
Замандаштарынын маалыматына караганда, маркум акыркы жылдары рак (ашказан рагы)менен ооруп жүргөн.
2008-жылы “Кыргызстандын жаңы адабияты” сайтын негиздеп, жазуучулар үчүн чыгармаларын жарыялоого мүмкүнчүлүк берген онлайн аянтча түзгөн. Борбор Азиядагы ачык онлайн-китепканага айланган сайтты өмүрүнүн аягына чейин иштетти.
2010-жылы Китеп чыгаруучулардын жана китеп жайылтуучулардын ассоциациясын башкарган.
Философиялык жанрдагы илимий иштердин үстүнөн иштеп, “Өмүр. Эволюция. Панволюция”, “Жылдыздар жана арбактар”, “Этностун аман калуу философиясы” сыяктуу 10 чакты китеп чыгарган. (BTo/NbA)
