Улуттук коопсуздук боюнча мамлекеттик комитет (УКМК) Жалал-Абад облусунун Ноокен районунун беш тургуну “Хизб ут-Тахрир” диний-экстремисттик уюмунун идеологиясынан баш тартканын билдирди. Алардын бири 23 жашта.
Атайын кызмат сөз болуп жаткандар буга чейин “Хизб ут-Тахрир” экстремисттик уюмунун ишмердүүлүгүнө катышып, анын идеологиясын активдүү жайылтып келишкенин кабарлады. Алар тандап алган диний багыты туура эмес экенин моюнга алып, башкаларды уюмдун мыйзамсыз иштерине аралашпоого чакырганын маалымдады.
Сот 2003-жылдан бери террорчу жана экстремисттик уюм катары 21 диний бирикменин Кыргызстандын аймагындагы ишмердигине тыюу салган.
Ага “Жабхат ан-Нусра”, “Жайшу л-Махди”, “Ансару л-Лах”, “Хизб ут-Тахрир ал-Ислами”, “Жихад тобу” жана “Чыгыш Түркстан Ислам кыймылы” сыяктуу эл аралык террордук жана экстремисттик уюмдар кирген.
Ишмердүүлүгүнө тыюу салынган топтордун көбү демократиялык, көп партиялуу мамлекеттик түзүлүштү кулатып, ордуна “шариятка негизделген эскичил халифатты” түзүүнү көздөшөт. (BTo)
