Президент Садыр Жапаров бүгүн, 26-декабрда Орусиянын Санкт-Петербург шаарында Көз карандысыз мамлекеттер шериктештигине мүчө өлкөлөрдүн лидерлеринин бейформал жолугушуусуна катышты.
Мамлекет башчынын басма сөз кызматы кабарлагандай, узап бара жаткан жылда уюмга төрагалык кылган Казакстандын президенти Касым-Жомарт Токаев шериктештиктин потенциалын чыңдоо аракети көрүлгөнүн айтты. Келерки жылы төрагалык кыла турган Кыргызстанга ийгиликтерди каалаган.
Орусиянын президенти Владимир Путин салттуу бейформал жолугушууга келгени үчүн баардык жетекчилерге ыраазычылык билдирди.
Иш-чарага шериктештикке мүчө мамлекеттер - Кыргызстан, Беларус, Азербайжан, Казакстан, Орусия, Тажикстан, Түркмөнстан, Өзбекстандын президенттери жана Армениянын премьер-министри катышты.
Жыйында кандай маселе көтөрүлгөнү тууралуу президенттин басма сөз кызматы кабарлаган жок.
КМШ өлкөлөрүнүн лидерлеринин салттуу бейформал жолугушуусу Орусиянын президенти Владимир Путиндин демилгеси менен жыл сайын Санкт-Петербург шаарында өтөт. (КЕ)
