Социалдык тармактарда "Саясий туткундарды колдоо эсеби" деген аталыш менен акча чогултуу жараяны башталды.
Алгач бул тууралуу 23-октябрда кармалып, 24-октябрда соттун чечими менен эки айга камалган жарандык активист Али Шабдандын келинчеги Нурайым Сыдыгалиева Твиттердеги баракчасына жазды.
Анын маалыматына караганда бул эсепке чогулган акча "Кемпир-Абадды коргоо" комитетинин ишмердүүлүгүнө жумшалат жана бир бөлүгү камакта отурган активист-саясатчылардын үй-бүлөсүнө берилет.
Ушундай эле билдирүүнү жарандык активист Рита Карасартованын кызы Касиет Мамырбай Инстаграммдагы баракчасына жайгаштырды.
"Түшкөн каражат саясий туткундарды колдоо жана Кемпир-Абад суу сактагычын коргоо/кыргыз-тажик чек арасындагы маселелерди чечүү боюнча комитеттин ишмердүүлүгүн улантууга багытталат. Андан тышкары, саясий туткундардын муктаж болгон туугандарына көмөк көрсөтүүгө жумшалат", - деп жазды Касиет Мамырбай.
Кемпир-Абад суу сактагычынын жеринин Өзбекстанга берилишине каршылык билдирип келаткан жыйырмадан ашуун оппозициялык саясатчылар жана активисттер 23-октябрда кармалган.
Ички иштер министрлиги (ИИМ) билдиргендей, аларга Кылмыш-жаза кодексиндеги “Массалык башаламандыктарды уюштурууга даярдануу” беренеси (36, 278) менен козголгон кылмыш иштин алкагында тергөө жүрүп жатат.
Кармалгандар башаламандык уюштурууга камынганы тууралуу аудио интернетке тараган. "Азаттык" бул аудиотасманын чын-төгүнүн азырынча тастыктай алган жок.
24-октябрда Бишкекте жүздөгөн жарандар жүрүшкө чыгып, аларды бошотуу талабы менен президент Садыр Жапаровго кайрылуу жолдошту.
Президент улуттук "Кабар" агенттигине курган маегинде камалгандардын ишине кийлигишпесин, чекитти сот кое турганын айткан.(ZKo)
