Украинанын президенти Владимир Зеленский Казакстандагы элчиси Петр Врублевскийди кызматтан алды. Жарлык 18-октябрда президенттин кеңсесинин сайтында жарыяланды. Элчилик кызматка ким келери азырынча белгисиз.
Врублевский быйыл августта блогер Диас Кузаиров аттуу блогер менен маегинде Украинадагы согушту комментарийлеп: “Мүмкүн болушунча көп орустарды өлтүрүүгө аракеттенип жатабыз. Канчалык көп орусту жок кылсак, алар ошончолук азыраак балдарыбызды өлтүрүшөт”, - деген.
Казакстандын Тышкы иштер министрлиги элчи менен сүйлөшкөнүн, ал билдирүүсү үчүн кечирим сураганын билдирген. Орус тарап Врублевскийди Казакстандан чыгарууну талап кылган.
52 жаштагы Врублевский Украинанын Казакстандагы элчиси болуп 2020-жылы дайындалган.
