"Кемпир-Абадды коргоо" комитетинин мүчөсү, активист Тилекмат Кудайберген уулу (Куренов) Кыргызстандан убактылуу чыгып кеткенин өзү "Азаттыкка" кабарлады. Анын айтымында, 23-октябрга караган түнү өлкөдөн чыгып кеткен жана жапырт кармоолор тууралуу уккандан кийин азырынча келбей турууну чечкен. Активист Фейсбуктагы баракчасына Вильнюска жеткенин жазды.
Тилекмат Кудайберген укук коргоо кызматкерлерине видеокайрылуу жасап, элдин коопсуздугун, мамлекеттин бүтүндүгүн бузуу максатында мыйзамсыз аракеттерге барбоого чакырды.
23-октябрда кармалган саясатчылардын, жарандык активисттердин айрымдарынын бөгөт чаралары карала баштады. Бишкектин Биринчи май райондук сотуна саясатчы Азимбек Бекназаров, Асия Сасыкбаева, Бектур Асанов, укук коргоочу Рита Карасартова жана жарандык активисттер Али Шабдан менен Чыңгыз Капаров, Атай Бейшенбек, Перизат Суранова, журналист, саясат талдоочу Айданбек Акматов алып келинди.
Президент Садыр Жапаров жапырт камакка алынган саясатчыларга жана активисттерге байланыштуу улуттук "Кабар" агенттигине комментарий берди.
Мамлекет башчы саясатчылар жана активисттер менен буга чейин да сүйлөшкөнүн, Кемпир-Абадга байланыштуу маселени түшүндүрүп бергенине карабай, майнап чыкпаганын билдирди.
"Кыскасы менден кеткен жок. Баары менен диалогго барып атам", - деди президент.
Жапаров камалгандардын ишине кийлигише албай турганын, чекитти сот кое турганын айтты.
23-октябрда кармалган саясатчылардын жана активисттердин бири Чыңгыз Капаров 20-декабрга чейин камакта калтырылды. Мындай чечимди 24-октябрда Бишкектин Биринчи май райондук соту чыгарды. Анын адвокаты Айдар Сыдыков сот чечимин мыйзамсыз деп атады.
Анын алдында акыйкатчы Атыр Абрахматова Чыңгыз Капаров саламаттыгына байланыштуу камакта отурушу мүмкүн эместигин, Омбудсмендин кеңсесинин кызматкерлери сотко мониторинг жүргүзүп жатканын айткан. Капаров өзү мыйзам бузбаганын билдирген.
Чыңгыз Капаров - "Бүткүл жаштар" партиясынын лидери. 2021-жылы парламенттик шайлоого бир мандаттуу №33 Нарын округунан катышкан.