Бүгүн 15-февралда Бишкектин Биринчи Май райондук соту Кемпир-Абад иши боюнча кармалып, камалган жарандык активист Али Шабдандын бөгөт чарасын карап, аны дагы эки айга тергөө абагында калтыруу жөнүндө чечим чыгарды.
Эми ал апрелдин ортосуна чейин №1 тергөө абагында кармалат.
Биринчи Май райондук соту 15-февралда Кемпир-Абад иши боюнча саясатчы Равшан Жээнбековдун да бөгөт чарасын 15-апрелге чейин узартты. Жээнбеков ооруканада дарыланып жаткандыктан, сотко алып келинген жок.
Ушул тапта аталган сотто Кемпир-Абад иши боюнча Акыл Айтбаевдин бөгөт чарасы каралып жатат.
Кемпир-Абад ишине байланыштуу камалган мурдагы депутат Орозайым Нарматованын үй камак мөөнөтү 20-апрелге чейин узартылганын бүгүн, 15-февралда "Азаттык" радиосуна анын адвокаты Гуляна Убалиева билдирди.
Жактоочунун айтымында, мындай чечим бүгүн Бишкектин Биринчи Май райондук сотунда чыкты.
"Нарматова ооруканадан чыкты, абалы бир аз жакшы", - деди Убалиева.
Нарматова жүрөк оорусу кармап, 28-январда "Тез жардам" менен ооруканага жеткирилгенден кийин, 30-январда үй камагына бошотулган.
Ага чейин, 27-декабрда Бишкек шаардык сотунда бөгөт чарасы каралып жатканда эсин жоготуп, кулап түшкөн Нарматованы конвой залдан көтөрүп чыгып, "Тез жардам" алып кеткен.
Мурдагы депутаттын темир тор ичинде кулап калган видеосу Интернеттеги социалдык түйүндөрдө тарап, кызуу талкуу жараткан.
Кемпир-Абад иши боюнча айыпталып, Бишкектеги тергөө абагында жаткан саясатчы Равшан Жээнбеков саламаттыгы начарлаганына байланыштуу Бишкектеги менчик клиникалардын бирине жаткырылды.
Бул тууралуу Жээнбековдун жардамчысы Айсулуу Кудайбердиева "Азаттыкка" билдирди. Ага ылайык, Жээнбеков ооруканага бөйрөгүн дарылатуу үчүн 14-февралда жаткырылган.
Маалыматты Жаза аткаруу кызматынын басма сөз катчысы Элеонора Сабатарова "Азаттыкка" ырастап, Жээнбековдун абалы канааттандырарлык деп сыпатталып жатканын кошумчалады.
Буга чейин абактагы оппозиционер саясатчы Равшан Жээнбеков өлкөнүн юстиция министрине, акыйкатчысына, журналисттерге жана укук коргоочуларга кайрылып, ден соолугуна байланыштуу көз каранды эмес консилиум түзүүгө жана тийиштүү дарылануудан өтүүгө жардамдашууга чакырган.
Боор оорусуна чалдыкканын билдирген саясатчы Жаза аткаруу кызматы ага Молдовановка айылындагы №31 колонияга которулуп дарыланууну сунуш кылганын айткан.
Кемпир-Абад иши боюнча айыпталып, Бишкектеги тергөө абагында жаткандардын дагы бири, жарандык активист Перизат Суранова саламаттыгы начарлаганына байланыштуу 14-февралда ооруканага жеткирилген.