Сузакта өспүрүм кызга үйлөнгөн милиция кызматкери иштен алынып, никесин кыйган имамга, кыздын апасына жана милиционердин өзүнө айып тагылып жатканын 28-сентябрда Башкы прокуратуранын басма сөз кызматы билдирди.
Мекеменин маалыматына караганда, Жалал-Абад облусунун Сузак районунун прокуратурасы Кылмыш-жаза кодексинин 175-беренесинин (“Диний ырым-жырымдарды өткөрүүдө нике курагы жөнүндө мыйзамдарды бузуу”) негизинде иш козгоп, натыйжада айып үч адамга тагылган.
Иш тергелип бүтүп, ушу тапта Сузак райондук сотунда каралууда.
Маалыматта айтылгандай, окуя 2021-жылдын 20-декабрында болгон. Сузактын райондук милицияда иштеген 27 жаштагы тургуну Базар-Коргон районунан 16 жаштагы кызга үйлөнүп, никесин Акман айылынын имамы кыйып берген.
2016-жылы Кыргызстанда кабыл алынган мыйзамда 18 жашка жете электерге нике кыюуга тыюу салынып, үч жылдан беш жылга чейин эркинен ажыратуу жазасы каралган. Мыйзам боюнча никеге уруксат берген кыздын ата-энеси дагы, нике кыйган имам дагы сот жообуна тартылат. Бирок ошого карабастан жашы жете элек кыздарды турмушка берген учурлар бар. Маселен, ЮНИСЕФтин 2018-жылдагы маалыматтарында Кыргызстанда 20-49 жаштагы аялдардын 12,7 пайызы 18 жашка чейин турмушка чыкканы айтылган. (RK)
