Казакстандын парламентинин Сенаты 22-сентябрда тунгуч президент Нурсултан Назарбаевдин күнүн мамлекеттик майрамдардын катарынан чыгарууну караган өзгөртүүлөр пакетин жактырды. Мыйзам долбоорун мурдараак төмөнкү палата – Мажилис кабыл алган. Документке президент кол коюшу керек.
2011-жылдын 10-декабрында парламент “Майрамдар жөнүндө” мыйзамга өзгөртүү киргизип, 1-декабрды Биринчи президенттин күнү деп бекиткен. Депутаттар мындай чечимди өлкөнүн ошол кездеги президенти Нурсултан Назарбаевдин “мамлекетке кылган кызматын көрсөтүү үчүн” кабыл алышканын айтышкан.
Назарбаев 2019-жылы кызматтан кетип, өлкөнүн саясатына таасирлүү орунду – Коопсуздук кеңешинин төрагалыгын ээлеп калган. 2022-жылдын январында массалык нааразылыктар баш аламандыктарга айланып, кандуу окуяга айланган учурда бул кызматын президент Касым-Жомарт Токаевге өткөрүп берген. Мындан кийин Нурсултан Назарбаевдин жакындары да кызматтан кетип, айрымдары камалды.
18-сентябрда Казакстандын президенти Касым-Жомарт Токаев борбор шаарды Нур-Султан деген аталыштан кайра Астана деп алмаштыруу жөнүндө Конституцияга киргизилген өзгөртүүлөргө кол койду. Иш жүзүндө бул шаардын атын өзгөрткөн алтынчы чечим болуп калды. (ErN)
