21-августта Ульяновскидеги ири жол кырсыгында каза болгондордун төртөө Жалал-Абад облусунун тургундары болгон. Мындай маалыматты "Азаттыкка" аймактагы жергиликтүү бийликтен кабарлашты.
Маалыматка ылайык, маркумдардын арасында Аксы районунун Үч-Коргон айыл аймагынын 22 жана 23 жаштагы тургундары болгон. Калган экөө Таш-Көмүр шаары менен Сузак районунун Жыгач-Коргон айылынын жашоочулары.
Үч-Коргон айыл өкмөтүнүн адиси Бактыгүл Атантаеванын "Азаттыкка" билдиришинче, аксылык эки жигит эки жылдан бери Орусияда иштеп жүргөн.
“Алар 1999-жылы туулган А. Т уулу жана 2000-жылы туулган Ш. Ж. Эки бала тең эки жылдан бери Орусияда иштеп жүргөнү белгилүү болду. 23 жаштагы маркумдун ата-энеси да Москвада эмгектенип жүргөн экен. Бүгүн айыл аймактын жооптуу кызматкерлери маркумдардын үйлөрүнө барып, жакындарына көңүл айтып кайтышты. Азыр алардын жакындары сөөктөрдү күтүп жатат”,- деди Атантаева.
Каргаша болгон жерде учурда Кыргызстандын Орусиядагы кыргыз элчилигинин өкүлдөрү жүргөнү, соттук-медициналык экспертизалар аяктагандан кийин маркумдардын сөөгү мекенине жөнөтүлөрү айтылды.
21-августта Ульяновскидеги ири жол кырсыгында 16 адам каза болгон, алардын 14ү кыргыз жарандары экени такталган. Маалыматтарга караганда, аварияга учураган кичи автобустагы кыргызстандыктар "кирди-чыкты" талабынан улам орус-казак чек арасына келип, кайра кайтып баратышкан.
Президент Садыр Жапаров 23-августту өлкөдө аза күтүү күнү деп жарыялады.(TB)
