Кыргызстандык сууда сүзүүчү Денис Петрашов Түркиянын Конья шаарында өтүп жаткан V Ислам шериктештиги оюндарында алтын байгенин ээси болду.
Маданият, маалымат, спорт жана жаштар саясаты министрлигинин маалымат кызматынын өкүлү Айгерим Турдалиеванын маалыматына караганда, Петрашов 100 метрге брасс ыкмасы менен сүзүүдө финалдык жарышта 1-орунду алды (1 мүнөт 0,54 секунд). Экинчи жана үчүнчү орунда түркиялык спортчулар келишти. Денис Петрашов ушуну менен бул мелдеште үчүнчү жолу байгеге ээ болду. Ал буга чейин 13-14-августта брасс ыкмасы менен 50 жана 200 метрге сүзүүдө эки коло байге алган.
16 -августта Петрашовдон сырткары кыргызстандык спортчулар бир күмүш жана бир коло байгеге ээ болушту.
Шахида Нармухамедова дзюдо боюнча кыз-келиндер арасында 78 килограмм салмакта күмүш байге алды. Ал алгач камерундук, жарым финалда марокколук спортчуну утуп, финалда түркиялык Нуркан Йылмазга жеңилип, 2-орунду ээледи.
Бул күнү спорттун аталган түрүнөн Асад Масабиров (81 кг) менен Даина Халмурзаева (+78 кг) коло байге үчүн беттеште атаандаштарына утулуп, 5-орунду алышты.
Ал эми Камила Абдулхамитова фехтованиеден (шпага) кыз-келиндер арасында жеке беттеште коло байге алды. Спорттун бул түрүнөн бир күн мурда Роман Петров эркектер арасында алтын медал тагынган.
Соңку жыйынтыктар боюнча V Ислам шериктештиги оюндарында Кыргызстандын спортчуларында тогуз алтын, жети күмүш жана сегиз коло байге бар. Медалдардын көрсөткүчү боюнча Кыргызстан азыр 9-орунга көтөрүлдү. Сап башында Түркия, Өзбекстан жана Иран турат.
Түркиялыктар 102 алтын, 85 күмүш, 69 коло байге алышкан. 2-катардагы Өзбекстанда 42 алтын, 30 күмүш жана 47 коло бар. Ирандын спортчулары 37 алтын, 34 күмүш, 43 коло байге менен 3-орунга чыкты.
Бешинчи жолу өтүп жаткан оюндарга 56 мамлекеттен 4 миңдей спортчу катышып, спорттун 20 түрүнөн таймашууда. Кыргызстандан жүздөн ашык спортчу барды. Мелдештер 18-августка чейин уланат. (ECh)
