Кыргызстандык жаш балбан Билол Шарип уулу Италиянын Рим шаарында өткөн күрөш боюнча 17 жашка чейинкилер арасындагы Дүйнө чемпионатында күмүш байге алды. Дүйнөлүк күрөш уюмунун сайтындагы маалыматка таянсак, Шарип уулу 31-июлда эркин күрөштөн 60 килограмм салмакта финалда ирандык Ебрахим Есмаел Елахичоуран менен беттеште бир упай айырма менен жеңилип (4:5), 2-орунду ээледи.
Ал финалга чейин төрт атаандашын уткан. Алгач казакстандык Айдын Бекбаевди 10:0, 1/8 финалда швециялык Аарон Марко Сбергди 10:0, чейрек финалда италиялык Алессандро Данте Нинини дагы 10:0, жарым финалда жапониялык Тайга Огинону 7:2 эсебинде жеңип алган.
Билол Шарип уулу 16 жашта. Июнь айында Бишкекте өткөн эркин күрөш боюнча 17 жашка чейинкилер арасындагы Азия чемпионатында алтын медал тагынган.
Эркин күрөш, грек-рим күрөшү жана кыздардын эркин күрөшү боюнча 17 жашка чейинкилер арасындагы Дүйнө чемпионаты Италиянын Рим шаарында 25-31-июль күндөрү өттү. Кыздардын эркин күрөшүнөн кыргызстандыктар Жаркынай Нурлан кызы (65 кг) жана Гүлнура Таштанбекова (69 кг) коло байгенин ээси болушту.
