Грекиянын түндүгүндө ишембиде кечинде АН-12 үлгүсүндөгү украиналык учак кыйрады. Баштапкы маалыматка ылайык, анда сегиз адам болгон жана баары мерт болду. Украинанын Тышкы иштер министрлиги кырсыкта курман болгондор украин жарандары экенин ырастады.
Учак Сербиядан 11,5 тонна аскердик жүк ташып келе жаткан жана аны Бангладешке жеткирмек.
Социалдык тармактарга жарыяланган виделолордон учак жерге кулап түшө электе эле өрттөнө баштаганын жана катуу жарылуу болгонун көрүүгө болот. Учакты өчүрүү иштери түнү менен уланган. Кырсык болгон аймакта жергиликтүү бийлик түтүндөн улам жарандарды беткап кийип, үйлөрүнүн эшик-терезесин ачпай турууга чакырды.
Грекияда жалпыга маалымдоо каражаттары бул учак Сербиянын Ниш шаарынын учуп чыкканын, учкуч көп өтпөй эле грек диспетчерлеринен авариялык конууга уруксат сураганын жазышты.
Маалыматка караганда, учак алгач Иорданиянын Амман шаарына конуп май куюп алгандан кийин Бангладешке учмак.
