Казакстандык теннисчи Елена Рыбакина Британиядагы Уимблдон ачык чемпионатынын финалында тунистик Онс Жаберди жеңип алды. Ал "Чоң шлем" турнирлеринин жекеме-жеке беттештерин уткан алгачкы казакстандык спортчу болуп калды.
23 жаштагы Рыбакина ишембиде Лондон шаарындагы финалдык оюндун биринчи айлампасын уттуруп жибергени менен калган эки айлампаны бир топ артыкчылык менен (3:6, 6:2, 6:2) жеңип алды.
Анын атаандашы Онс Жабер "Чоң шлем" турнирлеринин финалына чыккан биринчи араб жана африкалык теннисчи айым болуп калды. Ал учурда дүйнөнүн 3-ракеткасы.
Елена Рыбакина теннисчи кыз-келиндердин арасында дүйнөдө 23-орунда турат. Ал Орусиянын баш калаасы Москва шаарында төрөлгөн. 2018-жылы казак жарандыгын алып, турнирлерге Казакстандын атынан катыша баштаган.
Уимблдон мелдешинин эркектер арасындагы финалы 10-июлда болот. Анда сербиялык теннисчи Новак Жокович менен австралиялык Ник Кирьос беттешет.
