Жалал-Абад шаарындагы тез татым жайларынын дээрлик баары жабылды. Буга алардын санитардык талаптарды сактабаганы себеп болгонун шаардык мэриядан "Азаттыкка" билдиришти.
2-июлдагы рейд учурунда шаар аймагындагы тез татымдардын көбү тамак-ашты санитардык талаптарга ылайык сактабаганы аныкталган. Анда иштеген жумушчулардын көбүндө медициналык текшерүүдөн өткөнү жөнүндө тийиштүү документтери жок болгон.
Буга байланыштуу Жалал-Абад райондор аралык оорулардын алдын алуу жана санитардык-эпидемиологиялык борбору уруксат бергенге чейин менчигинин түрүнө карабай шаардагы бардык тез татым жайларын бүгүн, 2-июлдан тартып жабууга чечим чыгарды.
27-30-июнь күндөрү Жалал-Абад шаарындагы "Ага-ини" жана "Таж-махал" тез татым жайларынан тамактанган 70тен ашуун адам ууланган.
Мындан кийин Жалал-Абад шаарынын мэри Эрнисбек Ормоковдун тапшырмасы жана эпидемия-эпизоотияга каршы өзгөчө комиссиянын чечими менен шаардагы тез татым жайлары текшериле баштаган.
Милициядан массалык ууланууга байланыштуу факт бирдиктүү реестрге катталып, тергөө амалдары жүрүп жатканын кабарлашты.
Жалал-Абад шаарында 30дан ашуун тез татым жайлары бар.(TB)
