Кыргызстан Орусиянын чек ара кызматына Бишкектен 25 сотыхка жакын жерди 49 жылга ижарага бергени жатат. 13-июнда эки өлкөнүн ортосундагы макулдашууну парламенттин Эл аралык иштер, коргоо, коопсуздук жана миграция боюнча комитети колдоду.
Мамлекеттик мүлк фондунун башчысы Мирлан Бакировдун маалыматына караганда, Бишкектин Жибек Жолу жана Керимбеков көчөсүндө жайгашкан эки жер тилкеси “Глобал Инвест” ачык акционердик коомуна таандык. Ага Орусиянын чек ара кызматкерлерине турак жай жана башка имараттар курулган жана мүлктү Орусия жеке тараптан сатып алган. Орусия эми аны мыйзамдаштырууну суранып жатат.
“Алар жеке тарап менен келишим түзүп мүлктү алып атат. Кыргызстан аны Кадастрдан каттап, жерге мамлекеттик макам берет. Ал жердеги мүлктү жеке менчикке, ал эми жерди көп жылдык пайдаланууга алуу милдеттенмесин алып жатат”, - деди Бакиров.
Бакировдун айтымында, 1999-жылы Кыргызстан менен Орусиянын ортосундагы чек ара кызматташуусу жөнүндө макулдашуу кабыл алынган. Ага ылайык, Кыргызстан орус чек арачыларына турак жай үчүн Новопокровкадан имарат берген. Бирок ал жердеги имаратта шарт жок болгондуктан, орус чек ара кызматкерлери Жибек Жолу жана Керимбеков көчөсүндөгү эки имаратты алган.
Жогорку Кеңештин депутаты Чолпон Султанбекова Эл аралык иштер боюнча комитеттин жыйынында башка мамлекеттин аскерлерине Кыргызстандан мүлктү менчикке берүү кооптуу экенин айтты. (BTo)
