“Кумтөр Голд” ишканасы быйыл январь-май айларында өлкөнүн бюджетине салык жана башка милдеттүү төлөмдөр түрүндө 17,3 млрд сом төккөнүн 8-июнда билдирди. Компаниянын расмий сайтына жарыяланган маалыматта бул сумма “рекорддук” деп мүнөздөлүп, план 74,9 млн доллар болгону, иш жүзүндө 206.2 млн доллар төлөнгөнү белгиленди.
Кендеги тоо иштери беш ай ичинде 69,15 млн тоннага жеткнни, бул аралыкта алтындын орточо курамы 3,33 г/т болгон 2 млн 705 миң тонна кен казылып алынганы маалымдалды.
Быйыл 17-майда Кыргызстандын бийлиги Кумтөр алтын кенин өз алдынча башкарууга алганына бир жыл болду. Туура бир жыл мурда Жогорку Кеңеш кезексиз жыйынга чогулуп, Министрлер кабинетине “Кумтөр Голд” ишканасына убактылуу тышкы башкаруу киргизүүнү тапшырган.
Президент Садыр Жапаров быйыл 4-апрелде элге кайрылуу жасап, канадалык инвестор “Центерра” менен доо арыздан баш тартуу жана ортодогу талаш маселелерди чечүү боюнча макулдашууга кол коюлганын, Кыргызстан андагы 26 пайыздык акциясын өткөрүп, эки тарап доолордон баш тартарын жарыялаган жана мындан ары "Кумтөр Голддун" 100% акциясы Кыргызстанга таандык экенин билдирген.
"Бириккен демократиялык кыймыл" оппозициялык бирикмеси 13-апрелде Бишкекте жыйын куруп, бийликти бул макулдашуудан баш тартууга чакырган, аны менен өлкө экологиялык чыгымдарды өзүнө алганын утулуш деп атаган. (RK)
