Бүгүн 8-июнда Бишкекте футбол боюнча Азия кубогуна тандоо оюндарынын алкагында Кыргызстан Сингапур курама командасы менен беттешет. Оюн Дөлөн Өмүрзаков атындагы стадиондо кечки саат 20:00дө башталат.
Кыргызстандын улуттук курама командасы Азия кубогуна жолдомо үчүн F тайпасында Тажикстандын, Мьянманын жана Сингапурдун футболчулары менен беттешет.
2023-жылы өтө турган Азия кубогунун тандоо турниринин матчтары алты өлкөдө (Индия, Кувейт, Кыргызстан, Малайзия, Монголия, Өзбекстан) уюштурулууда.
Азия кубогунун тандоо оюндарынын акыркы баскычында 24 команда алты тайпада ойноп жатат. Бул оюндардын жыйынтыгында тайпанын лидерлери жана экинчи орунду ээлеген беш мыкты команда финалдык баскычка өтөт.
Азия кубогу 2023-жылы 16-июндан 16-июлга чейин Кытайдын 10 шаарында өтөт.
Азия кубогунда Кыргызстан 2019-жылы ойноп, мелдештин 1\8 финалына чейин жеткен.
Бүгүнкү оюндарга байланыштуу Бишкектин Эски аянтында бардык каалоочулар үчүн Legend фан-зонасы ачылат. Оюндар LED-экрандан түз эфирде 11 жана 14-июнда да көрсөтүлөт. (GT)
