Социалдык тармактарда окуучу кызды мугалим сабап жаткан видео тасма боюнча комиссия түзүлдү. Бул тууралуу Билим берүү жана илим министрлиги билдирди.
Окуя 23-майда Жалал-Абад облусуна караштуу Сузак районунун Сафаровка айылындагы Жоомарт Бөкөнбаев атындагы мектепте болгон. Окуучуну сабап жаткан информатика мугалими, кыз 7-класстын окуучусу.
Сузак райондук билим берүү бөлүмү түзгөн комиссия окуяны 26-майда териштирип, чечим кабыл алат.
Мугалим сабады деген окуялар буга чейин дагы болуп келген. Алардын бири Бишкекте да катталып, тергөөнүн жүрүшүн акыйкатчы өз көзөмөлүнө алган.
Өткөн жылы Кара-Суу районунун Отуз-Адыр айыл аймагына караштуу Кара-Дөбө айылында мугалим сабаган 8-класстын окуучусу аймактык ооруканага түшкөн. (МТа)
