Бүгүн, 14-майда Чолпон-Ата шаарында Run the Silk Road эл аралык марафону старт алды. Ага 22 өлкөдөн келген 3 миңдей жөө күлүк катышууда. Бул тууралуу Маданият, маалымат, спорт жана жаштар саясаты министрлиги кабарлады.
Марафонду Министрлер кабинетинин төрагасы Акылбек Жапаров ачып, Борбор Азиядагы эл аралык даражадагы марафон Ысык-Көлдө өтүп жатканын белгиледи.
"Марафонду кубануу менен колдойбуз. Анткени калкты дене тарбия менен алектенүүгө үндөп, спорт менен машыгууга чакырабыз", - деди ал.
Марафондо катышуучулар төмөнкү аралыкка жүгүрүшөт:
- Марафон — 42 чакырым 195 метр;
- Жарым марафон — 21 чакырым 97 метр;
- 10 жана 3 чакырым;
- 3 чакырымга скандинавиялык басуу;
- 10 чакырымга скандинавиялык басуу.
Марафондун байге фонду 1 млн. 534 миң сомду түзөт.
Спорттук иш-чарага Шанхай кызматташтык уюмуна (ШКУ) мүчө өлкөлөрдүн алдыңкы спортчулары жана Кыргызстандын жеңил атлетика боюнча курама командасынын мүчөлөрү катышууда.
Президент Садыр Жапаров 2021-жылы Шанхай кызматташтык уюмунун Ысык-Көл марафону "квалификациялык" деп таанылганын, анын нормативин толтурган спортчуларга дүйнөлүк чемпионатка, Олимпиада жана Азия оюндарына жолдомо берилерин айткан. 2021-жылдан тартып ШКУнун Ысык-Көл эл аралык марафонунда спортчулар нормативдерди аткарса Олимпиада оюндарына, Дүйнөлүк чемпионатка жана Азия оюндарына лицензия алуу мүмкүнчүлүгүнө ээ болушат.
Марафондун алкагында Issyk-Kul ITF 2022 эл аралык ири туристтик кѳргѳзмѳ-жармаңкеси дагы өтүп жатат. (КЕ)
