Рим папасы Франциск сентябрда Казакстанга барат. Бул тууралуу Ак ордо жана Ватикан 11-апрелде билдиришти.
Казак президентинин кеңсеси билдиргендей, Рим папасы Казакстанга расмий сапар менен барарын жана 14-15-сентябрда өтө турган Дүйнөлүк жана салттуу диндердин VII конгрессине катышарын ырастаган.
Аталган конгресс диндер аралык байланышты кеңейтүүгө багытталган. Биринчи мындай жыйын 2003-жылы болгон.
85 жаштагы Франциск 2013-жылы шайлангандан бери Борбор Азияга бара элек болчу.
Ал Орусиянын Украинага кол салышын бир нече жолу айыптап, согушка каршылыгын билдирген.
